13 мамыр күні ҚР Ұлттық академиялық кітапханасында ІІІ дәрежелі «Барыс», «Парасат» ордендерінің иегері, ҚР Еңбек сіңірген қайраткері, профессор, жырау Алмасбек Нұрмаханұлы Алматовтың алты томдық шығармалар жинағының таныстырылымы өтті.

Аталған басылым автордың 70 жылдық мерейтойына орай жарық көрген. Көптомдық жинаққа жыраудың «Шыңғыснама» тарихи дастандық циклінің бөлімдері, «Қазына» дастаны, арнау-толғаулары, «Өмір өнегесімен қымбат» атты әңгімелер жинағы, сондай-ақ жырау шығармашылығына арналған биобиблиографиялық көрсеткіш, ғылыми зерттеулері мен мақалалары енген.

Шара барысында Алмасбек Алматов мұрасының қазақ руханиятындағы орны, жыраулық дәстүрді жаңғырту мен жалғастырудағы еңбегі кеңінен сөз болды. Кешті ақын, филология ғылымдарының докторы, профессор Аманжол Әлтай жүргізді.

Жиында ҚР Мемлекеттік сыйлығының иегері, Қазақстанның халық әртісі, ҚР Еңбек Ері Қайрат Байбосынов, филология ғылымдарының докторы, профессор, ақын Жанат Әскербекқызы, Қазақстанның еңбек сіңірген қайраткері, профессор Жанғали Жүзбай және өзге де зиялы қауым өкілдері мен ғалымдар баяндама жасап, жыраудың тұлғалық болмысы мен шығармашылық мұрасына жан-жақты тоқталды.

Кеш аясында жыршылық өнердің жас өкілдері өнер көрсетті.