«Шәкәрім оқулары» республикалық әдеби байқауы 2023 жылдан бері Қазақстан Республикасының Ұлттық академиялық кітапханасының ұйымдастыруымен және «Адал-ас» өндірістік компаниясының демеушілік қолдауымен өткізіліп келеді.
Байқау қазақтың көрнекті ақыны, ойшылы әрі ағартушысы Шәкәрім Құдайбердіұлының 165 жылдық мерейтойына орай бастау алған.
Жобаның негізгі мақсаты – ақынның рухани мұрасын насихаттау, жас ұрпақтың туған тілге, көркем әдебиетке және поэзияға деген қызығушылығын арттыру, шығармашылық қабілеттерін дамыту.
Байқауға еліміздің 17 облысы мен 2 қаласындағы мектептердің 5–8 сынып оқушылары қатысады. Байқау екі кезеңнен тұрады: алғашқы кезең өңірлерде өткізіліп, жеңімпаздар Астана қаласында өтетін қорытынды кезеңде бақ сынайды.
Ереже бойынша қатысушылар Шәкәрім Құдайбердіұлының 20 өлеңін мәнерлеп жатқа оқып, ақынның өмірі мен шығармашылығына қатысты сұрақтарға жауап береді. Байқауға шығармашылық зиялы қауым өкілдері, бұқаралық ақпарат құралдары, кітапхана оқырмандары, ата-аналар мен оқытушылар қатысады.