24 желтоқсан күні ҚР Ұлттық кітапханасында қоғам белсендісі, ақын, сценарист, инклюзивті мәдениеттің жанашыры, ерекше жан Жүзбай Серіктің өмірден алынған “Өмір-ғайып” кітабының таныстырылымы өтті.

Автор 15 жылдан астам уақыт бойы тастанды балалар мәселесімен тікелей айналысып, 100-ден астам сәбиді анасына қайта қосуға, тағдырын сақтап қалуға ықпал еткен.

“Өмір-ғайып” — жүректі селт еткізер шынайы тағдырлардан құралған, тастанды бала мәселесін терең қозғайтын, адам жанына үңілетін әлеуметтік-маңызды туынды.

Кітап — тек шығарма емес, бұл үнсіз қалған сәбилердің дауысы, ана жүрегінің өкініші мен үміті, қоғамға қойылған өткір сұрақ. Автор бұл еңбегі арқылы адамгершілік, жауапкершілік және мейірім құндылықтарын алға тартады.

Іс-шарада кітаптың жазылу идеясы, инклюзивті қоғамды дамытудағы мәдениет пен өнердің рөлі туралы ойлар ортаға салынып, қонақтармен ашық сұхбат өрбіді.

Жүзбай Серік – “Qazaq Inclusive Theatre” театрының негізін қалаушы, “Мирас-А” қайырымдылық қоғамдық қорының басшысы,“Kozimnin Qarasi” Қазақстандық мүгедектер қоғамдық бірлестігінің төрағасы,“Инклюзивті қоғамды дамыту” Еуразиялық қауымдастығының құрылтайшысы, «Батыр шапағаты» медалінің және Мәдениет саласының үздігі.

Таныстырылымға зиялы қауым өкілдері, қоғам белсенділері, БАҚ өкілдері, оқырмандар қатысты.