Қазақстан Республикасы Ұлттық академиялық кітапханасының қоры Әзербайжан Республикасының CASPIA (Center for Analysis of Strategic Policy and International Affairs) талдау орталығы сыйға тартқан кітаптармен толықты.

Кітаптарды кітапханаға CASPIA орталығының директоры Орхан Йолчуев табыстады. Бұл бастама Әзербайжан Республикасының Президенті Әкімшілігінің қолдауымен жүзеге асып, Қазақстандағы «Оқитын ұлт» жобасын қолдауға және екі ел арасындағы ғылыми, мәдени-гуманитарлық байланыстарды нығайтуға бағытталған.

Кітап қорын табыстау Қазақстан мен Әзербайжанның ғылыми-зерттеу және сараптамалық қауымдастықтары арасындағы зияткерлік байланысты дамытуға жол ашады. Сонымен қатар бұл бастама оқырмандардың білім көкжиегін кеңейтіп, жас ғалымдар мен зерттеушілердің жаңа ақпарат көздеріне қол жеткізуіне мүмкіндік береді.

Тараптар алдағы уақытта бірлескен ғылыми-ағартушылық жобаларды жүзеге асыруға мүдделі. Мұндай бастамалар екі ел арасындағы академиялық әріптестікті одан әрі нығайтуға ықпал етеді.