Қазақстан Республикасының Ұлттық академиялық кітапханасында 2026 жылғы 21–24 сәуір аралығында заманауи ресейлік жазушылар, ақындар, блогерлер мен баспагерлердің қатысуымен шығармашылық кездесулер апталығы өтуде. Іс-шара Ұлттық кітап күніне арналған апталық аясында ұйымдастырылған.

Апталықтың ашылуы жазушы Елена Оуэнспен өткен кездесумен басталды. Автор өз шығармашылығы, эмиграциядан кейінгі өмірі және туған жерге деген сағыныштың әдеби туындыларына арқау болуы туралы әңгімеледі. Оның «Течёт река Волга» әңгімесі мен «Горький вкус соли» романында 1956–1971 жылдардағы кеңестік кезең көрініс тауып, Қазақстан тақырыбына, соның ішінде Алматы мен Талдықорған өңірлеріне қатысты оқиғаларға ерекше мән берілген.

Кездесуге Астана қаласындағы жоғары оқу орындарының студенттері мен оқытушылары қатысып, автормен еркін пікір алмасып, шығармашылық жолына қатысты сауалдарын қойды.