ҚР Ұлттық академиялық кітапханасы мен Курортология және медициналық оңалту ғылыми-зерттеу институты арасындағы ынтымақтастық туралы меморандум

Бүгін Қазақстан Республикасы Ұлттық академиялық кітапханасы мен Курортология және медициналық оңалту ғылыми-зерттеу институты арасында ынтымақтастық туралы меморандумға қол  қою рәсімі өтті.

Құжатқа кітапхана басшысы Күміс Қарсақбайқызы Сейітова және институт директоры Саягуль Айдарқызы Каиргельдина қол қойды.

Аталған құжат серіктестер арасындағы ғылыми-зерттеу, талдамалық құжаттарды ғылыми айналымға енгізуге және мәдени, білім беру байланыстарын нығайтуға негізделген өзара іс-қимылды кеңейтуге негізделген.

Курортология және медициналық оңалту ғылыми-зерттеу институты – бронх-өкпе жүйесінің ауруларын, сондай-ақ онымен байланысты жүрек-қан тамырлары, тірек-қимыл аппараты және орталық нерв жүйесінің ауруларын емдеуге  кешенді медициналық оңалтуға мамандандырылған мекеме. Кездесу барысында Институт директоры  Саягуль Каиргельдина мекеменің тарихы, бүгінгі атқарылып жатқан жұмыстары мен жетістіктері, алдағы  жоспарларымен бөлісті. Осы салаға байланысты құнды әрі сирек кітаптардың сандық нұсқаға өткізілуі және олардың оқырманға кедергісіз жол тартуы меморандумның басым бағыттарының бірі екенін сөзіне арқау етті.