Қазақстан Республикасы Ұлттық академиялық кітапханасында филология ғылымдарының докторы, профессор, академик, Қазақстан Республикасының еңбек сіңірген ғылым қайраткері Тұрсынбек Кәкішұлының ғылыми мұрасын дәріптеуге арналған «Ұлттық әдебиеттанудағы Тұрсынбек Кәкішұлының ғылыми мектебі» атты ғылыми семинар өтті.

Ғылыми семинарды ақын, Қазақстан Жазушылар Одағының мүшесі Дәулеткерей Кәпұлы жүргізіп, филология ғылымдарының докторы,профессор Жантас Жақып, филология ғылымдарының докторы, алаштанушы Сағымбай Жұмағұлов, ақын,жазушы, манасшы Баянғали Әлімжанов сөз сөйлеп, ғалым туралы естеліктерімен бөлісті.

Семинар барысында ғалымның ғылыми мектебі мен зерттеу әдістемесі, қазақ әдеби сынының тарихындағы орны, әдебиеттану ғылымына сіңірген еңбегі, шәкірт тәрбиелеудегі ұстаздық қыры туралы мазмұнды баяндамалар жасалып, ғылыми пікірлер ортаға салынды. Қатысушылар Тұрсынбек Кәкішұлының шығармашылық мұрасы мен ұлттық әдебиеттану ғылымындағы орнына қатысты өз ойларын білдірді.

Іс-шараға зиялы қауым өкілдері, әдебиеттанушы ғалымдар, жоғары оқу орындарының оқытушылары мен студенттері, кітапхана оқырмандары және әдебиетсүйер қауым қатысты.