«ҰЛТ ЖАДЫ ЖӘНЕ ТАРИХИ ТАНЫМ: ТҰРСЫН ЖҰРТБАЙДЫҢ ҒЫЛЫМИ-ШЫҒАРМАШЫЛЫҚ МҰРАСЫ»

ғылыми-тәжірибелік конференциясы өтті

Қазақстан Республикасы Ұлттық академиялық кітапханасында көрнекті жазушы, ғалым, филология ғылымдарының докторы, алаштанушы және абайтанушы, әуезовтанушы Тұрсын Құдакелдіұлы Жұртбайдың 75 жылдық мерейтойына арналған «Ұлт жады және тарихи таным: Тұрсын Жұртбайдың ғылыми-шығармашылық мұрасы» атты ғылыми-тәжірибелік конференция өтті.

Маңызды ғылыми жиын ғалымның көп жылғы зерттеу еңбегін саралап, оның ұлттық тарих пен әдебиеттану ғылымына қосқан үлесін кеңінен таныстыруға арналды.

Конференция барысында Тұрсын Жұртбайдың алаштану, әуезовтану, абайтану, әдебиеттану және архивтік зерттеулер бағытындағы еңбектері, ұлттық тарихи жадыны сақтау, тарихи мұраны зерделеу және оны келер ұрпаққа жеткізу мәселелері сөз болды.

Жиынды Ph.D, Л.Н. Гумилев атындағы ЕҰУ «Алаш» ғылыми-зерттеу институтының директоры Сұлтан Хан Аққұлұлы жүргізді.

Шара барысында ҚР Мәдениет және ақпарат министрлігі, ҚР Ғылым және жоғары білім министрлігі, Астана қаласының әкімдігі және Қазақстан Жазушылар одағы атынан мерейтой иесіне құттықтаулар жолданды.

Конференция аясында «Ұлт мұрасын ұлықтаған тұлға» атты кітап көрмесі ұйымдастырылды. Көрмеге Тұрсын Жұртбайдың көркем шығармалары, ғылыми-зерттеу еңбектері, Алаш қозғалысы мен Алаш зиялыларының тағдырына арналған зерттеулері, сондай-ақ Мұхтар Әуезовтің өмірі мен шығармашылығын зерделеген еңбектері қойылды.

Ғылыми жиында белгілі ғалымдар мен әдебиеттанушылар Әлібек Асқаров, Сәулебек Жәмкенов, Әбдуақап Қара,Ерлан Сыдықов, Ербол Тілешов, Ақеділ Тойшанұлы, Оңайгүл Тұржан, Жандос Әубәкіров, Дәулеткерей Кәпұлы, Жанбота Кәріпбаев, Алмахан Мұхаметқалиқызы, Ләйлә Баймағамбетқызы және басқа да зиялы қауым өкілдері баяндама жасап, ғалымның ғылыми-шығармашылық мұрасының өзекті қырларына тоқталды.

Конференцияға қоғам және мемлекет қайраткерлері, алаштанушы ғалымдар, әдебиеттанушылар, журналистер, жоғары оқу орындарының магистранттары мен студенттері қатысты.