Қазақстан Республикасы Ұлттық академиялық кітапханасында ақын, Қазақстанның еңбек сіңірген қайраткері Шөмішбай Сариевтің 80 жылдығына арналған «Шөмішбай Сариев – қос қанатты ақын» атты әдеби-сазды кеш өтті.

Іс-шараның басты мақсаты – ақын шығармаларындағы тағылымы мол ой-тұжырымдарды ұрпақ санасында жаңғырту, елдік пен ерлікті, Отан мен ұлт құндылықтарын арқау еткен ән-өлеңдерін және бай әдеби мұрасын кеңінен насихаттау.

Кеш аясында ақын шығармашылығына арналған «Жырмен өрілген ғұмыр» атты кітап көрмесі көпшілік назарына ұсынылды. Көрмеде қаламгердің кітаптары мен шығармашылық мұрасы кеңінен таныстырылды.

Әдеби-сазды кешті филология ғылымдарының докторы, ҰҒА академигі, Қазақстанның еңбек сіңірген қайраткері Уәлихан Қалижанов жүргізді.

Кеш қонақтары журналист, Қазақстанның еңбек сіңірген қайраткері Сауытбек Абдрахманұлы, жазушы, абайтанушы, филология ғылымдарының докторы, профессор Тұрсын Жұртбай, сондай-ақ ақын, журналист, Қазақстан Жазушылар одағы Астана қалалық филиалының төрағасы Бауыржан Бабажанұлы тағы басқа зиялы қауым өкілдері сөз сөйлеп, ақын жайлы естеліктерімен бөлісті.

Кеш барысында ақынның сөзіне жазылған әндер орындалып, жырлары оқылды.

Рухани кешке ақынның жары Жұмагүл Сариева, келіні мен немерелері, зиялы қауым өкілдері, танымал өнер иелері, БАҚ қызметкерлері, К.Байсейітова атындағы Қазақ ұлттық өнер университетінің магистранттары мен студенттері және кітапхана оқырмандары қатысты.

Кеш соңында қонақтар кітапханадағы Шөмішбай Сариев атындағы шығармашылық залға экскурсия жасап, ақын мұрасымен жақынырақ танысты. 2021 жылдан бері жұмыс істеп келе жатқан бұл залда қаламгердің жеке кітаптары мен қолжазбалары, марапаттары, дипломдары мен сертификаттары, сондай-ақ мыңға жуық кітап пен түрлі құжаттар сақтаулы.