2026 жылғы 16 наурыз күні сағат 15:00-де Қазақстан Республикасының Ұлттық академиялық кітапханасында ақын, драматург, аудармашы, прозаик, сатирик Ершу Маржан Аманқосқызының «Шам мен жыр» атты авторлық ертегісі бойынша ертегі терапиясы өтті.

Іс-шараның негізгі мақсаты – балаларды кітап оқуға баулу, олардың ойлау қабілеті мен қиялын дамыту, тарих туралы түсінігін кеңейту, сондай-ақ шешендік сөйлеу мәдениетін қалыптастыру.

Шара барысында қатысушыларға «Шам мен жыр» ертегісінің мазмұны таныстырылып, шығарманың негізгі идеясы – шам мен жырдың адам өміріндегі маңызы, рухани құндылықтар, өнер мен білімнің адам өміріндегі рөлі туралы кеңінен әңгімеленді.

Ертегі мазмұны бойынша талдау жүргізіліп, қатысушылар өз ой-пікірлерін ортаға салып, шығармашылық әңгіме мен пікір алмасуға белсенді қатысты. Сонымен қатар, балалар ертегідегі кейіпкерлер арқылы адамгершілік қасиеттердің мәнін түсініп, өнер мен білімнің құндылығын тереңірек ұғынуға мүмкіндік алды.

Шара барысында балалар ертегі кейіпкерлерінің бейнесіне еніп, олардың образдарын сахналық түрде сомдап, өз шығармашылық қабілеттерін көрсетті. Бұл көріністер балалардың қызығушылығын арттырып, ертегінің мазмұнын тереңірек түсінуге ықпал етті.

Шараға кітапхананың жас оқырмандары, ата-аналар мен ұстаздар қатысып, белсенділік танытты. Іс-шара мазмұнды әрі тәрбиелік мәні зор болып өтті. Қатысушылар кітап оқудың маңыздылығын түсініп, рухани құндылықтарға деген қызығушылықтарын арттырды.