Қазақстан Республикасының Ұлттық академиялық кітапханасында әнші, Қазақстан Республикасының Еңбек сіңірген қайраткері Айтбек Нығызбаевтың «Ақселеу әндері» атты кітабының таныстырылымы және әдеби-музыкалық кеш өтті.

«Ақселеу әндері» жинағы – қазақтың көрнекті жазушысы, этнограф-ғалымы, Мемлекеттік сыйлықтың лауреаты, Қазақстанның еңбек сіңірген қайраткері Ақселеу Сейдімбектің бай музыкалық мұрасын кеңінен насихаттау мақсатында жарық көрген еңбек. Басылым Мемлекеттік бағдарламаның әлеуметтік маңызы бар әдебиеттерді басып шығару жөніндегі кіші бағдарламасы аясында жарық көрген.

Қазақтың дәстүрлі өнері мен рухани мұрасын кеңінен зерделеген Ақселеу Сейдімбектің шығармашылық мұрасы сан қырлы. Оның халық арасында кеңінен танылған «Сарыарқа», «Дәурен-ай» секілді әндері тыңдарман жүрегінен ерекше орын алған. Алайда қаламгердің композиторлық мұрасы бұл туындылармен ғана шектелмейді.

2025 жылы Айтбек Жақсылықұлы осы мұраны жүйелеп, ел арасында сирек орындалып жүрген әндері мен күйлерін жинақтап, арнайы кітап етіп басып шығарды. «Ақселеу әндері» атты бұл басылымда Ақселеу Сейдімбектің  жазған әндері алғаш рет толық топтастырылып, ғылыми және ноталық негізде көпшілікке ұсынылды. Жинақтағы әндердің ноталары кәсіби музыкалық оқу орындарының талаптарына сай әзірленген.

Кеш барысында кітап авторы Айтбек Нығызбаев жинақтың дайындалу тарихы мен Ақселеу Сейдімбекпен шығармашылық байланысы туралы естеліктерімен бөлісті. Сондай-ақ Қазақстанның еңбек сіңірген қайраткері, профессор Серік Негимов, Қазақстанның еңбек сіңірген қайраткері, әдебиеттанушы Сауытбек Абдрахманов, ҚР Парламенті Сенатының депутаты Нұртөре Жүсіп сынды зиялы қауым өкілдері қаламгердің тұлғасы мен шығармашылығы туралы жылы пікірлерімен бөлісті.

Іс-шара барысында қаламгердің көпшілікке кең таралмаған, бұрын сирек орындалған әндері шырқалып, оның музыкалық мұрасы кеңінен насихатталды.

Кешке мәдениет және өнер қайраткерлері,зиялы қауым өкілдері, өнер зерттеушілері, студенттер, оқырмандар қатысты.