Қазақстан Республикасының Ұлттық академиялық кітапханасында «Конституция және жастар: жаңа ұрпақтың құқықтық мәдениеті» тақырыбында Жаңа Конституция жобасын талқылауға және алда өтетін республикалық Референдумды қолдауға арналған дөңгелек үстел ұйымдастырылды.

Іс-шараның мақсаты – Жаңа Конституция жобасының мазмұнын кеңінен түсіндіру, жастардың құқықтық мәдениетін арттыру, қоғамда конституциялық реформалардың маңызын талқылау және азаматтық белсенділікті нығайту.

Іс-шараға кітапхана ұжымы, зиялы қауым өкілдері, жоғары оқу орындарының ғалымдары, жас мамандар мен студенттер қатысты.

Шара барысында кітапхана басшысы К.Сейітова баяндама жасап, Жаңа Конституция жобасында Ұлы Даланың мыңжылдық тарихи сабақтастығын сақтауға, сонымен қатар мәдениет пен білім, ғылым мен инновация құндылықтарын бағдарға алуға басымдық беріліп отырғанын атап өтті.

Сондай-ақ еліміздің Конституция қағидаттарының қатарына «тарихи-мәдени  мұраны сақтау, төл мәдениетті қолдау» сынды  нақты қағидат енгеніне тоқталды.

Ақын, сазгер Ерғожа Тілепбердиев және Астана халықаралық университеті Өнер және дизайн жоғары мектебінің деканы Саят Ыбырай тағы басқа жиынға қатысушылар Жаңа Конституциялық жобаға қатысты өз пікірлерін ортаға салып, бұл реформаның елдің құқықтық жүйесін жетілдіруге, азаматтардың құқықтары мен қауіпсіздігін қамтамасыз етуге бағытталғанын жеткізді. Сонымен қатар жастарды алда өтетін республикалық референдумға белсенді қатысып, Жаңа Конституция жобасын қолдауға шақырды.

Дөңгелек үстел қорытындысы бойынша қатысушылар Жаңа Конституция жобасын және алда өтетін республикалық референдумды бірауыздан қолдайтындарын растады.