Қазақстан Республикасының Ұлттық академиялық кітапханасында Р.Б. Сүлейменов атындағы Шығыстану институты мен ҚР Ұлттық академиялық кітапханасы арасында өзара ынтымақтастық туралы меморандумға қол қою рәсімі өтті.

Меморандумның мақсаты – ұлттық рухани құндылықтарды, тарихи деректер мен мәдени мұраларды сақтау, толықтыру және кеңінен насихаттау бағытындағы екіжақты серіктестікті дамыту. Құжат аясында сирек кітаптар мен қолжазба мұраларын жинақтау, оларды ғылыми айналымға енгізу және оқырмандарға қолжетімділігін қамтамасыз ету қарастырылған.

Сонымен қатар, құнды қорлардың электрондық көшірмелерін әзірлеу және цифрлық форматта сақтау, сондай-ақ Шығыстану институты тарапынан жарық көрген ғылыми еңбектерді Ұлттық академиялық кітапхана қорына тұрақты негізде тапсыру жөнінде келісімге қол жеткізілді.