ҚР Ұлттық академиялық кітапханасында Қазақстан Республикасы Мәдениет және ақпарат министрлігінің қолдауымен V жалпы республикалық «KitapTime–2026» кітап фестивалі өтті.

Фестивальдің басты мақсаты – қоғамда кітап оқу мәдениетін насихаттау, оқырман мен кітап арасындағы байланысты жаңа форматта дамыту және әдебиетке деген қызығушылықты арттыру.

Фестиваль аясында кітап көрме-жәрмеңкесі, шығармашылық кездесулер, ашық сұхбаттар, Bookcrossing, Библиоринг, қолөнер шеберханалары, кітап тұсаукесерлері және ағартушылық жобалар ұйымдастырылды.

Фестивальдің маңызды жаңалығының бірі – Серб әдебиеті бұрышының ашылуы. Сонымен қатар «Бір кітаптың әсері», «Өзіңді тап – өзегіңе орал!», «Танымдық кітап өміріңді өзгерте ала ма?» тақырыптарында кездесулер өтіп, белгілі қаламгерлер мен қоғам өкілдері оқырмандармен ой бөлісті.

Сондай-ақ «Кітап, өнер және медиа: жаңа серіктестік» тақырыбында ҚР Ұлттық академиялық кітапханасы, «Қазақстан» ұлттық телеарнасы және Астана қаласы әкімдігінің «Жастар» театры арасында өзара ынтымақтастық туралы меморандумдарға қол қойылды.