Қазақстан Республикасының Ұлттық академиялық кітапханасында Ұлттық кітап күніне орайластырылған апталықтың салтанатты ашылуы өтті.

Апталық аясында кітап оқуды кеңінен насихаттау, зияткер жастарды қолдау және ұлттық мәдени құндылықтарды дәріптеу мақсатында «Кітап әлеміне қош келдіңіз» атты ашық есік күні ұйымдастырылды.

Шарада жазушы, ҚР Мемлекеттік сыйлығының лауреаты Әлібек Асқаров, ҚР Жазушылар Одағы  Астана филиалының директоры Бауыржан Бабажанұлы,  жазушы, драматург Жолтай Әлмашұлы, сыншы, публицист, Халықаралық «Алаш» әдеби сыйлығының лауреаты Амангелді Кеңшілікұлы  сынды құрметті қонақтар сөз сөйлеп, кітаптың қоғамдағы рөлі, әдебиеттің жас ұрпақ тәрбиесіндегі орны туралы шығармашылық тәжірибелерімен бөлісті.

Мәдени шара аясында «Сөзден өрілген әлем» атты иллюстрациялық кітап көрмесі көпшілік назарына ұсынылды. Көрмеде отандық және шетелдік авторлардың басылымдары таныстырылып, кітап иллюстрациясының эстетикалық және танымдық маңызы айшықталды.

Одан соң шара қазақ әдебиетінің көрнекті өкілі Қабдеш Жұмаділовтің шығармашылығына арналған «Қабдеш Жұмаділов: Ұлт жадын жазған жазушы» тақырыбында әдеби кездесуге ұласты.

Ұлттық кітап күніне арналған онкүндік аясындағы іс-шаралар алдағы күндері де жалғасын таппақ.