ҚР Ұлттық академиялық кітапханасында Қазақстан Республикасындағы Финляндия Елшілігімен бірлесіп Халықаралық балаларды қорғау күніне арналған мерекелік іс-шара өтті.

Қазақстан Республикасы Ұлттық академиялық кітапханасында 2026 жылғы 1 маусым – Халықаралық балаларды қорғау күніне орай «Балалықтың мөлдір әлемі» тақырыбында бірқатар мәдени-ағартушылық іс-шаралар ұйымдастырылды.

Айтулы күн аясында Астанадағы Финляндия Елшілігі, Қазақстан Республикасы Ұлттық академиялық кітапханасы және ISKU компаниясының бастамасымен фин балалар әдебиеті бұрышының салтанатты ашылуы өтті.

Ашылу салтанатында Ұлттық академиялық кітапхана директоры Күміс Қарсақбайқызы, ҚР Сыртқы істер министрлігі Еуропа департаментінің директоры Шолпан Кәрібекқызы, Қазақстан Республикасындағы Финляндия Төтенше және Өкілетті Елшісі Янне Хейсканен мырза құттықтау  сөз сөйлеп, салтанатты рәсімнің лентасын қиды.

Сонымен қатар, әлем балалар әдебиетінің көрнекті өкілі, фин жазушысы Туве Янссонның Муми-тролльдер туралы ғажайып ертегілері негізінде «Вдохновляясь историями Муми-троллей» атты мерекелік бағдарлама ұсынылды. Бағдарлама аясында Муми-тролльдер туралы дауыстап оқу, әдеби викторина, танымдық ойындар, шығармашылық тапсырмалар және балаларға арналған қызықты мәдени іс-шаралар ұйымдастырылып, бүлдіршіндерге көтеріңкі көңіл күй сыйлады.

Іс-шара барысында Финляндия Елшілігі кітапхананың балалар әдебиеті бұрышына танымал фин жазушыларының 70 кітабын сыйға тартты. Бұл бастама қазақстандық балалардың әлем халықтарының әдебиетімен танысуына және мәдени байланыстарды нығайтуға ықпал ететіні сөзсіз.