Қазақстан Республикасының Ұлттық академиялық кітапханасында «Әке мен бала» клубы аясында «Кітап және жасанды интеллект» атты дөңгелек үстел өтті.

Шараның мақсаты – кітап оқудың маңызын заманауи жасанды интеллект мүмкіндіктерімен ұштастыра отырып, әке мен бала арасындағы рухани байланысты нығайту және балалардың танымдық қызығушылығын арттыру.

Дөңгелек үстелді журналист, веломарафоншы Ернат Рахметолла  жүргізді. Кездесуде Ақмола облысы Аршалы ауданы, Дулат Бабатайұлы атындағы мектептің директоры Бауыржан Миралиев, «Шоқан Уәлиханов атындағы Тарих және этнология институтының» Астана қаласындағы филиалының директоры, тарихшы Құралай Сарсембина, «Айсын» радио-журналистика  мектебінің директоры, журналист Айсын Байтақова тағы басқа қонақтар өз ой-пікірлерін ортаға салды.

Мемлекет басшысы Қасым-Жомарт Тоқаевтың цифрландыру мен жасанды интеллектті дамыту жөніндегі бастамаларына сәйкес, 2026 жыл Қазақстанда «Цифрландыру және жасанды интеллект жылы» болып жарияланды.

Отырыс барысында қатысушылар кітап пен жасанды интеллекттің білім беру саласындағы рөлі, әкенің бала тәрбиесіндегі орны және отбасылық құндылықтарды қалыптастырудағы бірлескен оқудың маңызы туралы пікір алмасты.

Іс-шараға ата-аналар, балалар, ұстаздар және кітапхана оқырмандары қатысты.