Ағымдағы жылдың 26 маусым күні  Көкшетау қаласындағы М. Жұмабаев атындағы Ақмола облыстық әмбебап ғылыми кітапханасында «ЖАҺАНДЫҚ КӨЗҚАРАС ЖӘНЕ ТҰРАҚТЫ ДАМУ:КІТАПХАНАЛАРДЫҢ БОЛАШАҚТЫ ҚҰРУДАҒЫ РӨЛІ» атты Қазақстан Кітапханалар Одағының көшпелі отырысы өтті.

Екі күнге созылатын іс-шараға еліміздің республикалық, облыстық, қалалық және аудандық кітапханаларының басшылары мен мамандары, кітапхана ісі саласының сарапшылары қатысуда.

Шараны ҚР Мәдениет және ақпарат министрлігінің Архив, құжаттама және кітап ісі комитетінің төрағасы Айзада Амангелдіқызы Құрманова ашып, ҚР Мәдениет және ақпарат вице-министрі Рустам Алидің құттықтау хатын табыстады.

Шара өңірлік кітапханалардың мерейтойлық құттықтауларымен басталып, пленарлық отырыспен жалғасты.

Пленарлық отырыста кітапхана саласын дамыту, кәсіби қауымдастықтың өзекті мәселелері, кітапхана және баспа ісі туралы заң жобасы, жасанды интеллект технологияларын кітапхана қызметіне енгізу, библиографиялық стандарттар, электронды құжаттарды есепке алу, қоғаммен байланыс және жастардың кітапхана ісіндегі рөлі сияқты маңызды тақырыптар талқыланды.

Пленарлық отырыс аясында  сөз алған ҚР Ұлттық академиялық кітапханасының басшысы К.Қ.Сейітова «Кітапхана және баспа ісі туралы» Заң жобасы және Балалар кітапханасы:жаңа мазмұн, жаңа формат, жаңа мүмкіндіктер  тақырыбында баяндама жасады.

Сонымен қатар ҚР Ұлттық академиялық кітапханасы директорының Ақпараттық ресурстар және жастар саясаты жөніндегі орынбасары Н.Н. Жолдыбалинов «Қазақстан Кітапханалар Одағы сайтының мүмкіндіктерін, құрылымын және мақсатын түсіндіру» тақырыбында шеберлік сағатын өткізді.

Бағдарлама шеңберінде пленарлық отырыс, оқыту семинарлары, шеберлік сағаттары, тәжірибе алмасу алаңдары және жас кітапханашылар ұйымының жұмыс отырысы ұйымдастырылып, аталмыш шараға әріптестеріміз  Қорды құру қызметінің Айырбастау-резервтік секторының жетекшісі Муханова Динара, Кітап сақтау қызметінің Шетел әдебиеті секторының жетекшісі Аккулова Нұргүл, Ғылым, менеджмент және маркетинг қызметінің кітапханашысы Сакпанова Жанна Серикжановна қатысуда.

Қазақстан Кітапханалар Одағының көшпелі отырысы  аясында 27 маусым күні қатысушылар үшін Ақмола өңірінің тарихи-мәдени нысандарына танымдық экскурсиялар жүргізіледі деп күтілуде.