ҚР Ұлттық академиялық кітапханасында «Қазақ мифологиясы балалар көзімен» атты мәдени-ағартушылық жобаның ашылу салтанаты өтті.

      Жобаның басты мақсаты – көрнекті мифолог, зерттеуші Серікбол Қондыбайдың ғылыми мұрасын насихаттау, жас ұрпақтың ұлттық мәдениетке қызығушылығын арттыру және қазақ мифологиясын өнер арқылы таныту.

Іс-шарада Ұлттық академиялық кітапхана директорының орынбасары Айтоты Жақыпова, Серікбол Қондыбай атындағы мемориалдық музейдің ғылыми жетекшісі Балсұлу Қондыбай сөз сөйлеп, жобаның маңыздылығына тоқталды. Сондай-ақ мифология зерттеушісі, жазушы, киносценарист, аудармашы Зира Наурызбаева мен MARWIN компаниясының кітап бөлімінің менеджері Әмір Нұрабаев қатысты. Қонақтар назарына Серікбол Қондыбайдың өмірі мен ғылыми мұрасы, Шетпедегі музейі туралы деректі фильм ұсынылды.

Салтанатты ашылу рәсімінен кейін қатысушылар киелі Маңғыстау өңірі балаларының қиялынан туған 60 үздік туынды қойылған көрмені тамашалады.

Жоба аясында алдағы төрт апта бойы тақырыптық кітап көрмесі, танымдық дәрістер, мифтерді мәнерлеп оқу, шығармашылық шеберлік сабақтары мен пікірталас-кездесулер ұйымдастырылады.