ҚР Ұлттық академиялық кітапханасында көрнекті ғалым-текстолог, абайтанушы, жазушы, драматург, аудармашы Қайым Мұхамедхановтың туғанына 110 жыл толуына орай «Қайым Мұхамедханов – адал азамат, тарихи тұлға» атты халықаралық ғылыми-тәжірибелік конференция өтті.

Тағылымды басқосуға отандық және шетелдік ғалымдар, қоғам қайраткерлері, зиялы қауым өкілдері, жас зерттеушілер мен студенттер қатысып, ұлт руханиятына өлшеусіз үлес қосқан тұлғаның бай ғылыми-шығармашылық мұрасын кеңінен талқылады.

Конференция аясында ғалымның өмір жолы мен ғылыми еңбектерін жан-жақты таныстыру мақсатында «Қайым Мұхамедханов: тағдыр, тағылым, тұлға» атты кітап көрмесі ұйымдастырылды. Көрмеге Қайым Мұхамедхановтың кітаптары мен ғылыми зерттеулері, архивтік құжаттар, фотосуреттер, сондай-ақ ғалым туралы жазылған зерттеулер мен естелік жинақтар қойылды.

 «Қайым Мұхамедханов атындағы Білім және мәдениет орталығы» қоғамдық ұйымының директоры, ғалымның қызы Дина Мұхамедхан «21 ғасырдағы Қазақстан үшін Қайым Мұхамедхановтың рөлі» тақырыбында баяндама жасап, әкесінің бірқатар кітаптары мен зерттеу еңбектерін Ұлттық академиялық кітапхана қорына сыйға тартты.

Жиын барысында абайтанушы ғалымдар Ғарифолла Есім, Тұрсын Жұртбай, Айгүл Ісмақова, Гүлтас Құрманбай және басқа да зиялы қауым өкілдері Қайым Мұхамедхановтың өмірі мен шығармашылығына арналған мазмұнды баяндамалар жасап, тұлғаның ғылым мен әдебиеттегі орнына жан-жақты тоқталды.

Конференцияға АҚШ, Түркия, Әзербайжан, Башқұртстан және Татарстан елдерінен Қайым Мұхамедхановтың ғылыми мұрасын зерттеп жүрген ғалымдар, елімізге белгілі қоғам және мемлекет қайраткерлері, алаштанушы зерттеушілер, БАҚ өкілдері онлайн және офлайн форматта қатысты.