Қазақстан Республикасының Ұлттық академиялық кітапханасында «Қазақстан Республикасында электронды кітапханаларды қалыптастыру кезінде авторлық құқықтың сақталуы мәселелері» тақырыбында кеңес отырысы өтті.

Іс-шараны Қазақстан Республикасы Әділет министрлігінің Зияткерлік меншік құқығы комитеті, Қазақстан Республикасы Мәдениет және ақпарат министрлігінің Архив, құжаттама және кітап ісі комитеті және Қазақстан Республикасының Ұлттық академиялық кітапханасы бірлесіп ұйымдастырды.

Жиынға мемлекеттік органдардың өкілдері, зияткерлік меншік саласының мамандары, кітапханашылар, еліміздегі көпшілік кітапхана өкілдері (онлайн форматта) қатысты. Шараның басты мақсаты – электрондық кітапханаларды қалыптастыру және дамыту барысында авторлық құқық талаптарының сақталуын қамтамасыз ету, сондай-ақ қолданыстағы заңнамадағы өзгерістерді түсіндіру болды.

Шараның модераторы – Қазақстан Республикасы Әділет министрлігі Зияткерлік меншік құқығы комитеті төрағасының орынбасары Кәкен Гүлнара Қаратайқызы.

Гүлнара Қаратайқызы авторлық құқық мәселелері бойынша заңнамаға енгізілген өзгерістерге шолу жасап, электрондық контентті заңды пайдалану тетіктерін түсіндірді.

ҚР Ұлттық академиялық кітапханасының басшысы Күміс Сейітова электронды кітапханаларды қалыптастыру құқықтық мәдениетті талап ететін күрделі әрі жауапты үдеріс екенін баса айтып, кітапханадағы электронды қордың жұмысына тоқталды.

Қазақстан Республикасы Әділет министрлігі Зияткерлік меншік құқығы комитетінің бас сарапшысы Ботагөз Сатжанова өз баяндамасында Марракеш шартының маңызын және зағиптар мен көру қабілеті бұзылған, сондай-ақ баспа ақпаратын қабылдау мүмкіндігі шектеулі азаматтардың жария етілген туындыларға қолжетімділігін жеңілдету тетіктерін атап өтті.

Жиында «Репрографиялық құқықтар және бейнелеу өнері туындылары жөніндегі қазақстандық қоғам» қоғамдық бірлестігінің төрағасы Ринат Абдулхаликов  еліміздің  кітапханалары қызметінде авторлық құқықты бұзбау жолдары туралы баяндама жасап, практикалық ұсыныстарын ортаға салды.

Іс-шара соңында қатысушылар тарапынан қойылған сұрақтарға жауап беріліп, кітапхана саласында заң талаптарын сақтау мәдениетін арттыру және электрондық ресурстарды заңды түрде пайдалануды жетілдіру қажеттігі айтылды.