Қазақстан Республикасының Ұлттық академиялық кітапханасында Дүниежүзілік португал тілі күніне арналған халықаралық кездесу өтті.

Жыл сайын мамыр айында аталып өтетін бұл мереке португал тілінің әлемдік мәдениет пен өркениеттегі маңызын айқындайды. Бүгінде португал тілі Еуропа, Оңтүстік Америка, Африка және Азия құрлықтарындағы 265 миллионнан астам адамды біріктіріп отыр. Ана тілінде сөйлейтіндер саны бойынша әлемде алтыншы, роман тілдері арасында екінші орында.

Іс-шара аясында португал жазушысы, аудармашы әрі әдебиет сыншысы Бруну Виейра Амаралмен онлайн-кездесу ұйымдастырылды. Кездесу барысында қаламгер португал тілінің рухани және мәдени кеңістіктегі орны, қазіргі португал әдебиетінің даму үрдістері туралы әңгімеледі. Оның «Алғашқы жырмалар» романы бірқатар беделді португал әдеби сыйлықтарына ие болған.

Халықаралық кездесуді Қазақстан Республикасындағы Бразилия Федеративтік Республикасы мен Португалия Республикасының Елшіліктері бірлесіп ұйымдастырды. Іс-шараның мақсаты – португал тілін оқып-үйренуге қызығушылықты арттыру, қазіргі португал әдебиеті мен мәдениетін насихаттау.

Кездесуге Бразилия Федеративтік Республикасының Қазақстан Республикасындағы Төтенше және Өкілетті Елшісі Марсел Фортуна Биату, Португалия Республикасының Қазақстан Республикасындағы Төтенше және Өкілетті Елшісі Жозе Атаиде Амарал, дипломатиялық миссия өкілдері, ғылыми және шығармашылық зиялы қауым, жоғары оқу орындарының студенттері мен магистранттары қатысты.

Сонымен қатар, Бразилия және Португалия Елшіліктері кітапхананың португал әдебиеті бұрышына қазақ, орыс және португал тілдеріндегі  50-ден астам басылымды сыйға тартты. Бұл еңбектер португал тілді елдердің мәдениеті, тарихы, дәстүрлері мен қазіргі даму үрдістерін жан-жақты таныстырады.