Қазақстан Республикасының Ұлттық академиялық кітапханасында «Отбасымен оқимыз» клубы аясында қазақ әдебиетінің көрнекті өкілі Дәнеш Ахметұлының «Үкілі домбыра» әңгімесіне арналған тағылымы терең әдеби талдау сағаты өтті.

Бұл мазмұнды іс-шара  Ұлыстың ұлы күні қарсаңында ұйымдастырылған «Наурызнама» республикалық онкүндігі шеңберіндегі «Шаңырақ» күнімен үндесіп, ұлттық құндылықтарды ұлықтауға бағытталды.

Қазақ дүниетанымында «шаңырақ»  тек отбасының белгісі ғана емес, ол  ұрпақ сабақтастығының алтын діңгегі, елдік пен бірліктің, береке мен ырыстың киелі нышаны. Осы ұғымды дәріптейтін Шаңырақ күні жас ұрпақтың санасына отбасы құндылығының мәнін сіңіріп, ұлттық болмысты тереңірек танытуға мүмкіндік береді.

Әдеби кездесу барысында оқушылар «Үкілі домбыра» әңгімесінің мазмұнын талдап қана қоймай, шығарма арқылы берілетін рухани мұраттар мен ұлттық танымды зерделеді.

Кеш барысында өнерпаз оқырмандардың шығарма жайындағы тұшымды пікірлері мен шырқаған әндері, сондай-ақ дәстүрлі «ауылдың алты ауызы» көрерменге ерекше әсер сыйлады.

Клуб отырысына Ақмұрзаевтар, Ерғалиевтер және Әшімхановтар отбасылары, ата-аналар, ұстаздар, оқушылар мен кітапхана оқырмандары қатысты.