Әзербайжанның Баку қаласында «Түркі әлемі апталығы» аясында Түркі әлемі ұлттық кітапханалары одағының алғашқы құрылтай отырысы мен І конференциясы өтуде. Аталған халықаралық шара 1926 жылы Бакуде өткен Бірінші түркологиялық құрылтайдың 100 жылдығына арналды.

Құрылтайға Қазақстан, Түркия, Өзбекстан, Қырғызстан, Түрікменстан, Солтүстік Кипр және Венгрия елдерінің ұлттық кітапхана басшылары мен түркітанушы ғалымдары қатысуда. Халықаралық шараға ҚР Ұлттық академиялық кітапханасының директоры Күміс Сейітова қатысуда.

Халықаралық жиын аясында Әзербайжан Ұлттық кітапханасы қорындағы құнды материалдар негізінде дайындалған 1926 жылғы Бірінші түркологиялық құрылтайдың стенографиялық есептері мен мұрағаттық құжаттар жинағының тұсаукесер рәсімі өтті. Аталған кітапта құрылтай барысында көтерілген ғылыми баяндамалар, тарихи құжаттар мен сирек архив материалдары топтастырылған. Бұл еңбек түркі халықтарының ортақ ғылыми мұрасы мен рухани сабақтастығын танытатын құнды басылым саналады.

Конференция барысында түркі халықтарының ортақ жазба мұрасын цифрландыру, сирек қорларды сақтау және халықаралық цифрлық стандарттарды енгізу мәселелері талқылануда.