Қазақстан Республикасының Ұлттық академиялық кітапханасында ақын, аудармашы, Қазақстан Жазушылар одағының мүшесі Әбжан Әбілтайтың 75 жылдық мерейтойына орай «Сөз киесі» атты жаңа кітабының таныстырылымы өтті.

«Сөз киесі» – «Кәусар» баспасынан жарық көрген, автордың көпжылдық шығармашылық ізденісі мен азаматтық ұстанымын айқындайтын тағылымды еңбек. Төрт бөлімнен тұратын кітапта қоғамдағы түрлі құбылыстар мен адам болмысы туралы ой-толғамдар, әр кезеңнің өзекті мәселелерін қозғаған публицистикалық мақалалар, мерзімді басылымдарда жарияланған жүрекжарды жазбалар мен арнаулар топтастырылған. Сондай-ақ соңғы бөлімде замандастарының ақын шығармашылығы мен азаматтық келбеті жайлы жазған мақалалары, естеліктері және өлеңмен өрілген лебіздері берілген.

Әбжан Әбілтай – қазақ әдебиеті мен көркем аударма саласына елеулі үлес қосқан қаламгер. Еңбек жолын аудандық газеттен бастаған ол ұзақ жылдар бойы облыстық «Торғай таңы» басылымында жемісті қызмет атқарып, журналистік шеберлігін шыңдады. Өлең-жырлары арқылы оқырман ықыласына бөленіп, ел ішінде «Арқаның арқалы ақыны» атанды.

Кешті Қазақстан Жазушылар одағы Астана филиалының директоры, ақын Бауыржан Бабажанұлы жүргізді. Мерейтой иесіне Қазақстан Республикасының Президенті Қасым-Жомарт Тоқаевтың құттықтау хаты табысталды.

Шара барысында зиялы қауым өкілдері ақынды мерейлі жасымен құттықтап, шығармашылығына жоғары баға берді.