Қазақстан Республикасы Ұлттық академиялық кітапханасында академик Шора Сарыбаевтың ғылыми еңбектерінің таныстырылымы және тіл білімі саласының өзекті мәселелеріне арналған «Ғалым. Ғұмыр. Ғибрат» атты ғылыми-практикалық дөңгелек үстел өтті.

Іс-шара ҚР Ғылым және жоғары білім министрлігінің Тіл саясаты комитеті, ҚР Мәдениет және ақпарат министрлігі, Ұлттық академиялық кітапханасы, Ахмет Байтұрсынұлы атындағы Тіл білімі институты және Астана қаласының Тілдерді дамыту және архив ісі басқармасының ұйымдастыруымен өткізілді.

Алқалы жиында қазақ тіл білімінің көрнекті өкілі, филология ғылымдарының докторы, профессор, Қазақстан Республикасы Ұлттық ғылым академиясының академигі Шора Сарыбаевтың 100 жылдығына (1925–2025) орай жарық көрген ғылыми еңбектер жинағы таныстырылды. Сонымен қатар А.Байтұрсынұлы атындағы Тіл білімі институты дайындаған «Қазақ тілтанымының өзекті мәселелері» қостомдығы мен Халықаралық «Қазақ тілі» қоғамының бастамасымен жарық көрген «Ғалым. Ғылым. Ғибрат» жинағы көпшілік назарына ұсынылды, кітаптар кітапхана қорына сыйға берілді.

Басылымдарда ғалымның диалектология, лексикология, тіл тарихы, грамматика, терминология, емле, стилистика және лингводидактика салаларындағы ғылыми мұрасы жүйеленген.

Іс-шара барысында «Шам-Шырақ» Ғылым, білім мен өнер мирасын қолдау қорының өкілі, академиктің ұлы Қайрат Шораұлы Ш.Сарыбаевтың жеке кітапханасында сақталған тіл біліміне арналған сирек басылымдардың 1000-ға жуық жаңа легін Ұлттық академиялық кітапханасына сыйға тартты. 

       Естеріңізге сала кетейік, кітапханада  2021 жылы құрылған «Ш.Сарыбаев оқу залында» 5 мыңнан астам құнды әрі сирек кітап жинақталған. Бұл қор ғылыми зерттеушілер, студенттер және тіл, әдебиет, тарих саласындағы мамандар үшін құнды дереккөз болып табылады.

Жиынға мемлекет және қоғам қайраткерлері, көрнекті ғалымдар, ғылыми ұйымдар мен жоғары оқу орындарының өкілдері қатысты.