2026 жылғы 10 тамыз күні Қазақстан Республикасы Ұлттық академиялық кітапханасында «Абай әлемі – мәңгілік мұра» атты халықаралық ғылыми-тәжірибелік конференция өтті.

Іс-шара Абай Құнанбайұлының рухани мұрасын терең зерделеу, оны халықаралық деңгейде насихаттау және заманауи ғылыми тұрғыда талқылау мақсатында ұйымдастырылды.

Конференция аясында қатысушылар назарына «Абай – тұтас бір әлем» атты кітап көрмесі, сондай-ақ «Бозоқ – Ұлы Дала өркениеті» атты «Бозоқ» мемлекеттік тарихи-мәдени музей-қорығының көрмесі ұсынылды.

Іс-шараның модераторы – ақын, филология ғылымдарының докторы, профессор, Қазақстанның еңбек сіңірген қайраткері Аманжол Дүйсенбайұлы Әлтай болды. Конференцияны Қазақстан Республикасы Ұлттық академиялық кітапханасының директоры Күміс Қарсақбайқызы Сейітова ашып, Абай мұрасының ұлттық руханияттағы маңызына тоқталды.

Құттықтау сөз сөйлегендер қатарында «Абай» қорының төрағасы Ермек Айтқалиұлы Бейсембаев, Абайдың ұрпағы Ләйлә Баймағамбетқызы, сондай-ақ Қазақстандағы бірқатар шет мемлекеттердің Төтенше және Өкілетті Елшілері мен халықаралық ұйым өкілдері болды. Онлайн форматта Біріккен Араб Әмірліктері, Сербия және Қырғызстан елдерінен қатысушылар өз лебіздерін білдірді.

Конференция жұмысы үш негізгі бағыт бойынша өрбіді:

І. Абайтану: тіл, мәтін және ғылыми зерттеулер
Бұл бөлімде Абай шығармаларының тілдік ерекшеліктері, мәтінтану мәселелері, ақын мұрасын ғылыми тұрғыда зерттеу бағыттары кеңінен талқыланды. Ғалымдар Абай тіліндегі ұғымдардың семантикасы мен қазіргі абайтанудың өзекті мәселелерін көтерді.

ІІ. Абай шығармаларының аудармасы және әлемдік қабылдануы
Шетелдік және отандық зерттеушілер Абай шығармаларының әртүрлі тілдерге аударылуы, аудармадағы мәдени ерекшеліктер мен қиындықтар, сондай-ақ Абайдың әлемдік әдеби кеңістіктегі орны туралы баяндама жасады.

ІІІ. Абайдың рухани-философиялық мұрасы және қазіргі қоғам
Бұл секцияда Абай мұрасының бүгінгі қоғамдағы рөлі, ұлттық жаңғырудағы маңызы, рухани құндылықтар жүйесіндегі орны жан-жақты қарастырылды.

Іс-шара қорытындысы бойынша Абай шығармашылығын зерттеу мен насихаттау бағытындағы ынтымақтастықты кеңейту, ғылыми жобаларды қолдау және мәдени бастамаларды дамыту жөнінде ұсыныстар айтылды.