Қазақстан Республикасының Ұлттық академиялық кітапханасында 2026 жылғы 2 сәуір – Халықаралық балалар кітабы күні аясында бірқатар іс-шаралар өткізілді.

         Мерекелік шараға қатысқан мектеп оқушылары мен ұстаздарға «Кітаппен өс, біліммен өркенде»  атты кітап көрмесі ұсынылды. Кішкентай оқырмандар балалар жазушылары мен ақындарының  шығармалары туралы мазмұнды ақпарат алды. Кітап көрмесіне жалпы 125 басылым, соның ішінде қазақ, орыс, ағылшын, неміс, қытай және т.б. тілдердегі заманауи және классик балалар жазушыларының шығармалары, ертегілер, танымдық, фантастикалық шығармалар, комикстер, сондай-ақ мерзімді басылымдар қойылып, кітап оқудың маңыздылығы насихатталды.

Сонымен қатар «Отбасымен оқимыз» клубы аясында жазушы Бейбіт Қойшыбаевтың «Менің досым» атты шығармасына арналған әдеби талдау сағаты өтті. Іс-шара барысында қатысушылар шығарма мазмұнымен танысып, кейіпкерлердің іс-әрекеттеріне талдау жасады. Әдеби талқылау аясында достық, адалдық және адамгершілік тақырыптары кеңінен қозғалып, қатысушылар өз пікірлерімен бөлісті. Оқушылар шығарма бойынша алған әсерлерін ортаға салып, белсенділік танытты. Сонымен қатар, іс-шара барысында сұрақ-жауап ұйымдастырылып, балалардың ойлау қабілетін дамытуға және еркін пікір білдіруіне мүмкіндік жасалды.

Іс-шараға  Астана қаласындағы № 56, 59, 32, 78 және  «NURORDA» мектеп оқушылары, ұстаздары, ата-аналар, кітапхананың жас буын  оқырмандары   қатысты.