2026 жылғы 18 наурыз күні Қазақстан Республикасының Ұлттық академиялық кітапханасында Ұлттық киім күніне орай «Nomad Style Show» ұлттық киімдер фестивалі өтті. Іс-шара Қазақстан халқы Ассамблеясының ұлттық-мәдени орталықтарының қатысуымен ұйымдастырылды.

Фестивальдің басты мақсаты – Қазақстанда өмір сүріп жатқан этностардың мәдени мұрасын дәріптеу, ұлттық киім арқылы олардың тарихы мен болмысын таныстыру, сондай-ақ қоғамдағы мәдени әртүрлілік пен бірлікті насихаттау.

Аталған шараға Астана қаласындағы түрлі этномәдени бірлестіктердің өкілдері қатысып, өз халықтарының дәстүрлі киім үлгілерін, өнерлерін көпшілік назарына ұсынды. Көрсетілім барысында қазақ, беларусь, поляк, орыс, татар, түрікмен, өзбек және басқа да халықтардың ұлттық киімдері сахналанып, әрбір киімнің өзіндік ерекшелігі мен мән-мағынасы таныстырылды.

Фестиваль тек сән көрсетілімімен шектелмей, мазмұнды мәдени бағдарламамен толықты. Қонақтар Қазақстан халықтарының салт-дәстүрлерімен танысып, ұлттық әндер мен әуендерді тыңдап, түрлі халықтардың билерін тамашалады.