1 қыркүйек – Білім күніне орай Қазақстан Республикасының Ұлттық академиялық кітапханасында балаларға арналған «Білімге бастар жол» атты мерекелік іс-шара өтті.

Іс-шараның негізгі мақсаты – жас оқырмандарды жаңа оқу жылын көтеріңкі көңіл күймен бастауға ынталандыру, білім мен кітаптың адам өміріндегі маңызын насихаттау, балалардың кітап оқуға деген қызығушылығын арттыру.

Мерекелік бағдарлама барысында балалардың жас ерекшеліктеріне сай танымдық, тәрбиелік және ойын-сауық сипатындағы іс-шаралар өткізілді. Қатысушыларға балалар әдебиетінің таңдаулы үлгілері мен жаңа басылымдарды таныстыру мақсатында «Кітаппен бірге – білімге» атты кітап көрмесі ұйымдастырылды. Көрмеге балаларға арналған 135 дана кітап қойылды.

Іс-шара аясында балалардың білімін, тапқырлығын және шапшаңдығын дамытуға бағытталған «Ойлан! Тап! Үздік бол!» атты интерактивті ойын өткізілді. Ойын барысында жас оқырмандар түрлі логикалық тапсырмаларды орындап, қызықты сұрақтарға жауап беріп, өз білімдері мен зеректіктерін көрсетті.

Сонымен қатар, «Әжемнің ертегілері» жобасы аясында «Ақыл мен парасат» атты ертегі оқылып, оның мазмұны бойынша талдау жүргізілді.

Іс-шараны қазақ радиосының ардагер дикторы Күләш Кәйләнқызы жүргізді. Жас оқырмандардың кітапхана туралы түсінігін кеңейту мақсатында «Кітапханаға саяхат» атты танымдық бағдарлама ұйымдастырылды. Бағдарлама барысында балалар кітапхананың балалар әдебиеті қорымен және оқу залдарымен танысып, кітапты іздеу, таңдау және тиімді пайдалану жолдары жөнінде ақпарат алды.

Мерекелік іс-шараға мектеп оқушылары, ата-аналар, ұстаздар және кітапхана оқырмандары қатысты.