«Ахмет Жұбанов – қазақ халқының мақтанышы» атты әдеби-музыкалық кеш
17 April 2026
Қазақстан Республикасының Ұлттық академиялық кітапханасында Ұлттық кітап күні аясында қазақ кәсіби музыка өнерінің негізін қалаушы, көрнекті композитор, дирижёр, музыка зерттеушісі, Қазақстанның халық әртісі, академик Ахмет Жұбановтың туғанына 120 жыл толуына арналған «Ахмет Жұбанов – қазақ халқының мақтанышы» атты әдеби-музыкалық кеш өтті.
Кеш барысында Ахмет Жұбановтың өмірі мен шығармашылығына арналған арнайы бейнесюжет ұсынылды.
Іс-шараның мақсаты – ұлт руханиятына өлшеусіз үлес қосқан тұлғаның өмір жолы мен шығармашылық мұрасын кеңінен насихаттау, жас ұрпақтың ұлттық музыка өнеріне деген қызығушылығын арттыру.
Кеш гибридті форматта ұйымдастырылып, офлайн және онлайн қатысушыларды біріктірді. Шараны Қазақстан Республикасының еңбек сіңірген қайраткері, «Құрмет» және «Парасат» ордендерінің иегері Жоламан Қайменұлы Тұрсынбаев жүргізді.
Іс-шараға мәдениет және өнер саласының белгілі өкілдері, ғылыми қауым мен жоғары оқу орындарының мамандары қатысты. Олардың қатарында Қазақ ұлттық өнер университеті проректоры, профессор Раушан Сабыржанқызы Нұртаза, композитор Серік Жексембекұлы Еркімбеков, дирижёр Қайырғали Қожанбаев және басқа да зиялы қауым өкілдері бар.
Кеш барысында композитордың таңдаулы шығармалары орындалып, тағылымды естеліктер айтылды.
