Қазақстан Республикасының Ұлттық академиялық кітапханасында жазушы Дидахмет Әшімханұлының өмірі мен шығармашылығына арналған өлкетанушы Ләззат Қажаеваның «Сәулелі ғұмыр» атты кітабының тұсаукесері өтті.

Бұл басылым – қазақ әдебиетінде өзіндік қолтаңбасын қалдырған қаламгердің өмір жолын, шығармашылық мұрасын және азаматтық болмысын танытатын құнды еңбек. Альбом-кітапқа жазушының өмірінен сыр шертетін фотосуреттер мен бала күнінен бірге өскен ауылдас сыныптастарының естеліктері енгізілген.

Кітаптың тұсаукесерін белгілі мемлекет және қоғам қайраткері, ғалым-публицист Сауытбек Абдрахманов жүргізді. Шараға зиялы қауым өкілдері, әдебиеттанушылар мен қаламгерлер қатысып, жазушының қазақ әдебиетіндегі орны мен өнегелі өмірі туралы ой бөлісті.

Жазушының досы, ақын Әлібек Қаңтарбаев, жазушы Әлібек Асқар, Құрылтай депутаты, ақын Жанарбек Әшімжан, ақын, Қазақстан Жазушылар одағы Астана қалалық филиалының төрағасы Бауыржан Бабажанұлы және басқа да кеш қонақтары қаламгер туралы естеліктерімен бөлісіп, оның шығармашылық мұрасының маңызын атап өтті.