22 қазанда Қазақстан Республикасының Ұлттық академиялық кітапханасында Республика күні қарсаңында «Түркістан» екі томдық энциклопедиясының тұсаукесері өтті.

Қазақстан Республикасы Мәдениет және ақпарат министрлігі мен Түркі мәдениеті және мұрасы қорының қолдауымен ұйымдастырылған шараға мемлекет және қоғам қайраткерлері, ғалымдар, зиялы қауым өкілдері мен түркітілдес бес елдің дипломатиялық өкілдері қатысты.

Екі томдық энциклопедияның бас редакторы әрі жоба жетекшісі – тарих ғылымдарының докторы, академик Дархан Қыдырәлі, жауапты редакторы – әдебиеттанушы, филология ғылымдарының кандидаты Тұрдықұл Шаңбай. 2021-2025 жылдары әзірленген ауқымды ғылыми еңбекке 300-ден астам ғалым мен зерттеуші қатысып, 4000-нан астам атау мен ұғым қайта зерделенген.

Энциклопедияда Түркістанның көпғасырлық тарихы, түркі халықтарының ортақ мәдени мұрасы мен өркениеттік дамуы қамтылған. Басылым тарихи деректерді жүйелеп, түркі дүниесіне ортақ рухани құндылықтарды ғылыми тұрғыда зерделеуге және оларды келер ұрпаққа жеткізуге бағытталған.

Шара аясында энциклопедия авторларына Қазақстан Республикасы Президентінің Алғыс хаттары табысталды. Сонымен қатар Түркі мәдениеті және мұрасы қорының президенті Ақтоты Райымқұлова академиктер Дархан Қыдырәлі мен Әділ Ахметовке «Түркі мәдениеті мен мұрасы амбассадоры» құрметті атағын беріп, энциклопедияның жауапты редакторы Тұрдықұл Шаңбай мен Әзербайжандағы «Turkistan.az» ақпараттық порталының бас редакторы, белгілі журналист Ақыл Джамалға қордың арнайы Алғыс хаттарын ұсынды.

Тұсаукесер барысында қонақтар сөз сөйлеп, энциклопедияның ғылыми-танымдық маңызына тоқталды.