Қазақ поэзиясының көрнекті өкілі, Қазақстанның халық жазушысы Хамит Ерғалиевтің туғанына биыл 110 жыл толып отыр. Осы мерейтойға орай ҚР Ұлттық академиялық кітапханасында арнайы кітап көрмесі ұйымдастырылды.

Хамит Ерғалиев – қазақ әдебиетінде эпикалық поэмалардың дамуына зор үлес қосқан ақын. Оның шығармаларында ел тарихы, халық тағдыры, майдандағы ерлік пен еңбек адамының өмірі кеңінен жырланды.

Ақынның қаламынан туған отыздан астам кітаптың ішінде «Әке сыры», «Құрманғазы», «Алтын зерең», «Жедел толғау», «Өмір өрнегі» сынды туындылары ерекше орын алады. Оның шығармалары – қазақ әдебиетінің алтын қорына қосылған құнды мұра.

2018 жылы ақынның туыстары Ұлттық академиялық кітапхана қорына 1470 дана кітап тапсырған. Бүгінде бұл жеке қорда қаламгердің шығармалары, замандастарының еңбектері, сирек кітаптар мен мерзімді басылымдар сақтаулы.

Хамит Ерғалиевтің 110 жылдығына арналған көрме – ақын мұрасын жаңғыртып, оның шығармашылығын бүгінгі оқырманға таныстырудың бір мүмкіндігі.