10 қазан күні сағат 15:00-де Астана қаласындағы Қазақстан Республикасының Ұлттық академиялық кітапханасында «Алматы–Қазақстан Үнді классикалық билері және йога орталығының»                  20 жылдығына арналған «Үнді классикалық билері: әдебиет пен                би үндестігі» атты мерекелік концерт өтеді.

Мерейтойлық іс-шара еліміздің мәдени өміріндегі маңызды оқиғалардың бірі болып, үнді классикалық би өнерінің дәстүрлерін сақтау, кеңінен насихаттау және одан әрі дамытуға арналады.

        20 жыл бойы Қазақстан Республикасының еңбек сіңірген қайраткері Ақмарал Қайназарованың жетекшілігімен жұмыс істеп келе жатқан «Алматы–Қазақстан Үнді классикалық билері және йога орталығы» үнді мәдениеті мен өнеріне қызығушылық танытатын өнерсүйер қауымды біріктіретін мәдени-шығармашылық ортаға айналды. Орталық өз қызметі барысында үнді классикалық би өнерін Қазақстанда кеңінен танытуға елеулі үлес қосып, көрермендерге үнді биінің бай тарихын, өзіндік эстетикасын және ғасырлар бойы қалыптасқан дәстүрлерін таныстырып келеді.

Орталықтың ресми сайты: http://www.indiandance.kz/

Мерекелік бағдарлама қонақтарға үнді би өнерінің сан қырлы әлемімен танысуға мүмкіндік береді. Би труппасының орындауында дәстүрлі үнді әдебиетінің шығармалары негізінде қойылған хореографиялық композициялар ұсынылады.

Бағдарлама барысында үнді классикалық би өнерінің басты ерекшеліктерінің бірі саналатын қол қимылдарының мәнерлілігіне, дене пластикасына, мимикаға және музыкалық сүйемелдеуге ерекше назар аударылады. Осы көркемдік құралдардың үйлесімі арқылы үнді әдебиетінің мазмұны мен кейіпкерлердің сезімі би тілімен жеткізіледі.

Мерейтойлық концерт Орталықтың шығармашылық есебі ғана емес, сонымен қатар оның жиырма жылдық шығармашылық жолының қорытындысы болмақ. Іс-шара аясында үнді классикалық би өнерінің дамуына үлес қосып келе жатқан ұстаздар, бишілер мен ұжымның барлық мүшелерінің еңбегі атап өтіледі. Олардың кәсіби ізденісі мен шығармашылық еңбегінің арқасында үнді классикалық би өнері Қазақстан көрермендеріне кеңінен танылып, елімізден тыс жерлерде де өз тыңдарманы мен көрерменін тауып келеді.

Сонымен қатар, концерттің өткізілуі мәдени байланыстарды нығайтуға және мәдениетаралық диалогты дамытуға ықпал етеді. Іс-шара көрермендерге Үндістанның бай әдеби дәстүрімен, көркемдік мұрасымен және классикалық би өнерінің терең мәдени негіздерімен жақынырақ танысуға мүмкіндік береді.