11 қыркүйек 2026 жылы сағат 11.00-18.00 аралығында Қазақстан Республикасы Мәдениет және ақпарат министрлігінің қолдауымен Қазақстан Республикасының Ұлттық академиялық кітапханасында «KiтaпTime-2026» V жалпы республикалық кітап фестивалі өтеді.

Жыл сайын дәстүрлі түрде ұйымдастырылатын фестивальдің негізгі мақсаты – қоғамда кітап оқу мәдениетін кеңінен насихаттау, оқырман мен кітап арасындағы байланысты жаңа форматта дамыту, әдебиетке деген қызығушылықты арттыру және білімді, ойлы, мәдениеті жоғары ұрпақ қалыптастыру.

Бұл бағыт Мемлекет басшысы Қасым-Жомарт Тоқаевтың «Зерделі ұлт» қалыптастыру, қоғамның интеллектуалдық әлеуетін арттыру және кітап оқу мәдениетін дамыту жөніндегі бастамаларымен үндеседі.

«KiтaпTime-2026» фестивалі аясында әдебиет пен өнер, білім мен медиа салаларының өзара байланысын нығайтуға бағытталған бірқатар мәдени және ағартушылық іс-шаралар ұйымдастырылады.

Сондай-ақ баспалардың қатысуымен көрме-жәрмеңке,  қолөнер шеберханалары, «Bookcrossing», Библиоринг, «Жасөспірімдерге арналған оқу залының ашылу салтанаты және басқа да инновациялық іс-шараларды өткізу жоспарлануда.

Фестиваль бағдарламасындағы жаңалықтардың бірі – Серб әдебиеті бұрышының ашылуы. Жаңа әдеби кеңістік Қазақстан мен Сербия арасындағы мәдени байланысты нығайтып, серб әдебиеті мен мәдениетін қазақстандық оқырманға кеңінен таныстыруға мүмкіндік береді.

Сондай-ақ «Кітап, өнер және медиа: жаңа серіктестік» тақырыбында Қазақстан Республикасының Ұлттық академиялық кітапханасы мен «Қазақстан» ұлттық телеарнасы, сондай-ақ Астана қаласы әкімдігінің «Жастар» театры арасында өзара ынтымақтастық туралы меморандумдарға қол қою рәсімі өтеді.

Фестиваль бағдарламасында:

- философия ғылымдарының докторы Алибек Қажығалиұлының «Зверь в глубине» кітабының тұсаукесері;

- жазушы, филология ғылымдарының кандидаты Йана Боризбен шығармашылық кездесу;

- «Bilte» әдеби агенттігінің негізін қалаушы Едіге Қожахметпен «Танымдық кітап өміріңді өзгерте ала ма?» тақырыбындағы ашық сұхбат;

-  «Бір кітаптың әсері» – танымал тұлғалардың кітап туралы сұхбаттары;

- «Өзіңді тап – өзегіңе орал!» ағартушылық TEDx форматындағы презентациялар;

-  «Ауылға кітап» акциясы;

- кітап оқу мәдениетін насихаттауға бағытталған өзге де мәдени-ағартушылық және инновациялық жобалар қамтылады.

Фестивальдің маңызды ерекшелігі – «KiтaпTime-2026» бастамасының республика көлемінде қолдау табуы. 11 қыркүйек күні еліміздің өңірлеріндегі көпшілік кітапханалар фестивальді қолдау мақсатында түрлі форматтағы кітап мерекелерін, ағартушылық іс-шараларды ұйымдастырады.

Фестивальге мемлекет және қоғам қайраткерлері, шетелдік дипломатиялық өкілдіктердің өкілдері, зиялы қауым, ақын-жазушылар, суретшілер, қолөнер шеберлері, иллюстраторлар, блогерлер мен БАҚ өкілдері, ата-аналар, балалар, студенттер, кітапханашылар, оқырмандар және Елорда тұрғындары қатысады деп күтілуде.

Фестиваль барысы республикалық және өңірлік бұқаралық ақпарат құралдарында, сондай-ақ әлеуметтік желілерде кеңінен ақпараттандырылып, көпшілік назарына ұсынылады.