Қазақстан Республикасының Ұлттық академиялық кітапханасында әлем әдебиетінің көрнекті өкілі, қытай жазушысы, әдебиет саласы бойынша Нобель сыйлығының иегері Мо Янь қазақ қаламгерлерімен кездесуі өтті.

Қаламгер кітапханадағы тарихи және мәдени құндылығы жоғары қолжазбалар мен сирек құжаттар жинағымен танысып, ҚР Ұлттық академиялық кітапхана қорына қытай тілінде жарық көрген роман кітабын қолтаңба жазып, кітапхана басшысы Күміс Қарсақбайқызына тарту етті.

Шараны Қазақстан Жазушылар одағының төрағасы Мереке Құлкенов жүргізіп, тәуелсіздік алғалы елімізге алғаш рет Нобель сыйлығының иегері келгенін атап өтіп, жазушы Мо Яньға елімізге арнайы ат басын бұрғаны үшін алғыс білдірсе,  жазушы Төлен Әбдік Нобель лауреатының елімізге сапарын төл әдебиеттегі маңызды құбылыс деп бағалады.

«Шығармашылық жолым туған жерім Гоумиде басталды. Балалық шағымда анамнан ерте айырылдым. Сол сәтте анам туралы ұлы шығарма жазамын деп өзіме сөз бердім. Әлемдегі барлық шығармада ана ұлы, оның пейілі Жер-Анадай кең. Алайда мен ана образын солай жазсам, өзге авторлардан еш айырмашылығым болмасын білдім. Сондықтан менің шығармамдағы ана образы қарама-қайшылыққа толы», деді жазушы.

Кездесу барысында жазушы көркем шығарма жазудағы тәжірибесі, қаламгердің ізденісі, әдебиеттегі адам болмысын бейнелеу мәселелері туралы ойларымен бөлісті.  

Кездесуге зиялы қауым өкілдері, әдебиет зерттеушілері мен белгілі қаламгерлер қатысты. Жиналғандар жазушыға өздерінің қызықты сұрақтарын қойып, әлемдік деңгейдегі қаламгердің шығармашылық жолы мен жазу үдерісі туралы құнды кеңестер алды.