Бүгін Қазақстан Республикасы Мәдениет және ақпарат министрлігінің қолдауымен, ҚР Ұлттық академиялық кітапханасының ұйымдастыруымен жазушы, Қазақстанның еңбек сіңірген қайраткері Сәуле Мағазбекқызы Досжанның «Бала шақтан болашаққа» атты ғұмырнамалық-танымдық повесінің таныстырылымы аясында Астана қаласында екі бірдей мазмұнды кездесу өтті.

Аталған шығармада Қасым-Жомарт Кемелұлы Тоқаевтың өмір жолы, ата-анасының тағдыры, балалық шағы мен азамат болып қалыптасу кезеңдері жас оқырманға түсінікті тілмен баяндалады. Кітаптың негізгі мақсаты – өскелең ұрпақтың бойында адамгершілік, жауапкершілік, отансүйгіштік секілді құндылықтарды қалыптастыру және ел тарихына деген қызығушылықты арттыру.

Алғашқы кездесу Кәрім Мыңбаев атындағы №59 мектеп-лицейінде ұйымдастырылды. Жүздесу барысында қаламгер шығарманың жазылу идеясы туралы айтып, кейіпкер тұлғасының қалыптасу кезеңдеріне тоқталды. Оқушылар кітап мазмұны мен жазылуына қатысты сауалдарын қойып, еркін пікір алмасты.

Кездесу одан әрі Еуразия гуманитарлық институты жоғары колледжінде жалғасты. Студенттермен өткен ашық сұхбатта Сәуле Мағазбекқызы шығармашылық ізденісі, зерттеу жұмыстары және тарихи тұлғаның өмірін көркем түрде бейнелеудегі жауапкершілік туралы ой бөлісті. Сонымен қатар жастарды білімге ұмтылуға, табандылық танытуға және ел дамуына үлес қосуға үндеді.

Шаралар соңында білім беру ұйымдарының басшылары құрметті қонаққа алғыстарын білдірді.