Қазақстан Республикасының Ұлттық академиялық кітапханасында «Әжемнің ертегілері» жобасы аясында «Ертегілер елінде» атты сахналық қойылым көрсетілді.

Іс-шараның негізгі мақсаты – оқушыларды халық ауыз әдебиетімен тереңірек таныстыру, ұлттық құндылықтарды дәріптеу, сондай-ақ олардың шығармашылық қабілеттерін дамыту болды.

Шара барысында ертегі жанрының маңызы туралы қысқаша мәлімет беріліп, оның тәрбиелік мәні кеңінен түсіндірілді. Ертегілер арқылы жас ұрпаққа жақсылық пен жамандық, адалдық пен зұлымдық ұғымдарын ұғындыру көзделді.

Қойылымға №97 мектеп-гимназияның 2 “А” және 2 “Ә” сынып оқушылары қатысып, қазақ халық ертегілерін сахналады. Атап айтқанда, «Жыл басына таласқан хайуанаттар», «Ұр, тоқпақ», «Мұнара-құмыра», «Қарлығаштың құйрығы неге айыр?» ертегілері көрермен назарына ұсынылды.

Іс-шара аясында оқушылар өздері алдын ала оқып танысқан ертегі кітаптарының мазмұны негізінде сахналық қойылымдар көрсетіп, әдеби шығармаларды театрландыру арқылы олардың мазмұнын әсерлі жеткізе білді. Сахналық қойылым барысында оқушылар өздерінің актерлік шеберліктерін көрсетіп, кейіпкерлер бейнесін шынайы сомдады.