6 мамыр күні Қазақстан Республикасы Ұлттық академиялық кітапханасында Қазақстанның құрметті журналисті, «Құрмет» орденінің иегері Ғалия Балтабайдың «Тұлғалар – жауһар жандар» атты кітабының таныстырылымы өтті.

Аталған еңбек – автордың бұған дейін жарық көрген «Тұлғалар – ғажап жандар» кітабының жалғасы, үшінші томы. Жинақта ел тарихында өшпес із қалдырған мемлекет және қоғам қайраткерлерінің, мәдениет пен руханиятқа үлес қосқан тұлғалардың өмір жолы мен еңбегі баяндалады. Кітапта Қасым-Жомарт Тоқаев Ұлттық Құрылтайда атап өткен «Адал табыс. Адал еңбек. Адал адам» қағидаттары аясындағы ой-толғамдар да көрініс тапқан.

Шара барысында автордың өңір журналистикасын дамытуға қосқан үлесі кеңінен айтылды. Ғалия Құсайынқызының бастамасымен жарық көрген сын материалдарының нәтижесінде Павлодарда қазақ театры мен облыстық балалар ауруханасы, Екібастұзда қазақ мектептері мен балабақшалар ашылғаны атап өтілді. Ол – көптеген жас журналистердің ұстазы, 40-тан астам әдеби-музыкалық бағдарламаның авторы. Бүгінде оның 10-нан астам кітабы жарық көрген.

Таныстырылымға зиялы қауым өкілдері, ғалымдар, қоғам қайраткерлері, БАҚ өкілдері мен оқырмандар қатысты.