2026 жылғы 5 мамыр күні Қазақстан Республикасының Ұлттық академиялық кітапханасында «Отбасымен оқимыз» клубы аясында 9 мамыр – Жеңіс күніне арналған жазушы, Қазақстанның Халық қаһарманы Қасым Қайсеновтің «Жау тылындағы бала» шығармасы бойынша әдеби талдау сағаты өтті.

Іс-шараның мақсаты – оқырмандарды Қасым Қайсеновтің өмірі мен шығармашылығын таныстыру, соғыс тақырыбындағы туындылар арқылы жас ұрпақтың бойында отансүйгіштік, ерлік, қайсарлық қасиеттерді қалыптастыру, сондай-ақ кітап оқуға деген қызығушылықты арттыру.

Әдеби талдау барысында қатысушылар Қасым Қайсеновтің өмір жолы мен шығармашылық мұрасына кеңінен тоқталып, оның қаламынан туған «Жау тылындағы бала» әңгімесінің мазмұнын терең әрі жан-жақты талдады. Шығармадағы басты кейіпкердің ауыр тағдыры, ерте есейген бейнесі, батылдығы мен төзімділігі атап өтіліп, туындының тәрбиелік мәні айқындалды. Іс-шараға қатысқан кітапхана оқырмандары, ата-аналар мен балалар, ұстаздар және кітапсүйер қауым белсенділік танытып, өз ой-пікірлерін ортаға салды.