30 сәуір күні Қазақстан Республикасының Ұлттық академиялық кітапханасы ұйымдастыруымен «Алаш» қозғалысының негізін қалаушы, ұлт көсемі Әлихан Бөкейханның 160 жылдығына арналған халықаралық ғылыми-тәжірибелік конференция өтті.

Конференцияның модераторы – Ph.D, Л.Н. Гумилев атындағы Еуразия ұлттық университеті жанындағы «Алаш» ғылыми-зерттеу институтының директоры Сұлтан Хан Аққұлы.

Ғылыми жиында Алаш қайраткерлерінің ұлттық мемлекеттілік құру, демократиялық қоғам қалыптастыру, ағарту ісі мен ғылымды дамыту бағытындағы идеялары кеңінен талқыланды. Қатысушылар Алаш мұрасын тарихи жауапкершілік тұрғысынан бағалап, оның бүгінгі Тәуелсіз Қазақстан құндылықтарымен сабақтастығын жан-жақты саралады.

Конференция жұмысына академик Дихан Қамзабекұлы, чех ғалымы Михал Рак (Прага, Чехия), алаштанушы ғалымдар Тұрсын Жұртбай, Айгүл Ісмақова, Шерубай Құрманбайұлы және басқа да отандық жетекші зерттеушілер қатысты. Олар Әлихан Бөкейханның азаттық жолындағы күресін терең талдап, Алаш идеясының өміршеңдігін, зиялылар мұрасын жүйелі зерттеудің маңызын атап өтті.

Сондай-ақ Чехия мен Словакияның мұрағаттары, кітапханалары мен музей қорларынан тың деректер тапқан зерттеуші Дінмұхамет Байжұма «Алаш Орда және чехословак корпусы» тақырыбында баяндама жасады. Ал жас ізденуші, чех және словак тілдерінің маманы Сұлтан Франция армиясы, Чехословакия Сыртқы істер министрлігі және Женевадағы Ұлттар Лигасы мұрағаттарынан табылған Алаш тарихына қатысты бұрын ғылыми айналымға енбеген құжаттарды таныстырды.