24 сәуір күні IX Халықаралық «Astana Eurasian Book Fair – 2026» кітап көрмесі аясында Мемлекеттік сыйлықтың иегері, Қазақстанның еңбек сіңірген қайраткері, көрнекті жазушы Әлібек Асқаровтың мерейлі 75 жасына арналған тағылымды әдеби-шығармашылық кеш ұйымдастырылды. Іс-шара барысында қаламгердің кітаптарынан арнайы көрме қойылып, оқырман назарына ұсынылды.

Кеш барысында қаламгердің қазақ әдебиетіндегі өзіндік орны, прозалық шығармаларындағы көркемдік ізденістері, ұлттық болмысты бейнелеудегі шеберлігі кеңінен сөз болды.

Мерейтойлық басқосуда қаламгердің шығармашылық жолы мен әдебиетке келу кезеңдері жан-жақты баяндалды.

Шара барысында Қазақстанның еңбек сіңірген қайраткері, белгілі жазушы және қоғам қайраткері Әділ Ахметов, Қазақстанның еңбек сіңірген қайраткері, журналист, публицист Сауытбек Абдрахманов, жазушы, абайтанушы ғалым, филология ғылымдарының докторы, профессор Тұрсын Жұртбай тағы басқа құрметті қонақтар сөз сөйлеп, Әлібек Асқаров шығармашылығы мен азаматтық болмысына тоқталды.

Ақын Маралтай Райымбекұлы мерейтой иесіне арнаған өлеңін оқып, кештің рухани мазмұнын тереңдете түсті.

Тағылымды кешке зиялы қауым өкілдері, ақын-жазушылар, оқырмандар қатысты.