2026 жылғы 24 сәуірде Президенттік орталық ғимаратында өткен IX Халықаралық «Astana Eurasian Book Fair – 2026» көрме-жәрмеңкесі аясында өзбек ақыны, аудармашы әрі редактор Чори Аваздың «Жүрек маусымы» атты кітабының тұсаукесері өтті.

Чори Аваз – өзбек поэзиясының көрнекті өкілі. Оның жырларынан адам жанының нәзік иірімдері, өмір мен тағдыр туралы терең толғаныс көрініс табады. Ақынның шығармалары ағылшын, араб және түрік тілдеріне аударылып, халықаралық деңгейде танылған. Енді міне, «Жүрек маусымы» кітабы қазақ тіліне тәржімаланып, отандық оқырманға жол тартты.

Тұсаукесер кешіне «Шарқ юлдузи» журналының бас редакторы Сирожиддин Рауф, «Фаворра» киностудиясының директоры Келдиёр Хожаёров, режиссер Зарифа Гофурова, ақынның жары Зебо Омонова және зиялы қауым өкілдері қатысты.

Кеш барысында сөз алған қазақ жазушысы, Қазақстанның еңбек сіңірген қайраткері Сәуле Досжан жиналған қауымды кітап мерекесімен құттықтап, қазақ пен өзбек халықтарының рухани сабақтастығы мен әдеби байланысының маңыздылығын ерекше атап өтті.