Қазақстан Республикасының Ұлттық академиялық кітапханасында 23 сәуір – Ұлттық кітап күніне орай басталған апталық аясында «Ұлт жадын жазған жазушы» Қабдеш Жұмаділовтің шығармашылығына арналған лекция өтті.

Іс-шараның мақсаты – қазақ әдебиетінің көрнекті өкілі, тарихи прозаның ірі тұлғаларының бірі Қабдеш Жұмаділовтің шығармашылық мұрасын кеңінен насихаттау, оның ұлттық болмыс пен тарихи жадыны көркем тілмен бейнелеудегі ерекше қолтаңбасын жастарға таныстыру.

Сондай-ақ, бұл кездесу «Бір ел – бір кітап–2026» республикалық акциясы аясында ұлт болып оқылатын шығарма авторының еңбегін тереңірек түсіндіруге бағытталды.

Лекцияны жас жазушы, Л.Н.Гумилев атындағы Еуразия ұлттық университетінің бірінші курс студенті Мұхамедали Абдуллаев жүргізді. Ол өз баяндамасында Қабдеш Жұмаділовтің шығармашылық жолына тоқталып, жазушының тарихи романдары, әсіресе қазақ халқының тағдыры, елдік идея, көшпелі өмір философиясы мен ұлт рухын көтерген туындыларына жан-жақты талдау жасады.

Шараға қатысқан жазушылар мен әдебиеттанушылар сөз алып, Қабдеш Жұмаділовтің қазақ әдебиетіндегі орны, оның тарихи романдар арқылы ұлттық сананы жаңғыртудағы рөлі жөнінде пікірлерін ортаға салды.