Бүгін Қазақстан Республикасы Ұлттық академиялық кітапханасы мен Қазақстан Республикасы Жоғары Сот Кеңесі жанындағы Академиясы арасында ынтымақтастық туралы меморандумға қол  қою рәсімі өтті.

Аталған құжат ғылыми-зерттеу, талдамалық және білім беру бағыттарындағы серіктестікті нығайтуға және өзара іс-қимылды дамытуға бағытталған. Кітапхана басшысы Күміс Сейітова меморандумға қол қою білім, ғылым және мәдениет салаларындағы бірлескен жұмысты жаңа деңгейге көтеріп, кәсіби әрі ақпараттық алмасуды кеңейтуге мүмкіндік беретінін атап өтті.

Кездесу барысында Академия ректорының міндетін атқарушы Канат Мусин оқу орнының негізгі қызмет бағыттарымен таныстырды.

Қазақстан Республикасы Жоғары Сот Кеңесі жанындағы Академиясы – сот жүйесі үшін кадрлар даярлауда ерекше мәртебеге ие еліміздегі бірегей жоғары оқу орны. Академия жоғары оқу орнынан кейінгі білім беру бағдарламаларын жүзеге асырады, судьялар мен сот жүйесі қызметкерлерін даярлау, қайта даярлау және олардың біліктілігін арттыру жұмыстарын жүргізеді, сондай-ақ ғылыми қызметпен белсенді айналысады.

Ғылыми ортаны дамытуға ерекше көңіл бөлінеді. 2023 жылдан бастап Академияда «Сот төрелігі академиясының хабаршысы» ғылыми журналы жарық көреді. Журналда құқық ғылымының түрлі бағыттары, сот практикасы және сот білімі мәселелері бойынша ғылыми мақалалар жарияланады. Басылым Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті ұсынған басылымдар тізбесіне енгізілген.

Меморандумға қол қою ғылыми әлеуетті біріктіруге, кәсіби ақпараттық ресурстарға қолжетімділікті кеңейтуге және құқықтық ағарту мен ғылыми зерттеулер саласындағы бірлескен жобаларды жүзеге асыруға бағытталған институционалдық ынтымақтастықты дамытудың маңызды қадамы болмақ.