Түркі мәдениеті және мұрасы қоры Президенті Ақтоты Райымқұлова қор тарапынан жарық көрген басылымдарды Қазақстан Республикасының Ұлттық академиялық кітапханасы қорына сыйға тартты.

Кездесу барысында түркі халықтарының ортақ тарихы, әдебиеті мен рухани құндылықтарын насихаттауға бағытталған бірлесіп атқарылар  жобалардың маңыздылығы сөз болды.  Қор шығарған кітаптар – түркі өркениетінің бай мұрасын ғылыми тұрғыдан зерделеуге арналған іргелі зерттеулер, тарихи-танымдық еңбектер мен мәдени басылымдар.

Ақтоты Райымқұлова өз сөзінде түркі дүниесінің ортақ құндылықтарын сақтау мен болашақ ұрпаққа жеткізуде кітапханалардың рөлі айрықша екенін атап өтті. Ал Ұлттық академиялық кітапхана ұжымы бұл сыйлық  – ғылыми қауымдастық пен оқырман үшін аса маңызды рухани қазына екенін жеткізді.