Қазақстан Республикасы Ұлттық академиялық кітапханасында көрнекті қаламгер, әдебиет сыншысы, «Айбоз-2025» ұлттық әдеби сыйлығының лауреаты Амангелді Кеңшілікұлының «Жүрек сөзі», «Сөз патшасы» және Ромен Ролланның «Толстойдың өмірі» (аударма) кітаптарының таныстырылымы өтті.

Іс-шараны мемлекет және қоғам қайраткері, Мемлекеттік сыйлықтың лауреаты Сауытбек Абдрахманов жүргізді.  Жиында Қазақстанның халық жазушысы Төлен Әбдік сөз сөйлеп, қаламгердің ұлттық әдебиеттегі орны мен шығармашылық ізденістеріне жоғары баға берді. Сондай-ақ ТҮРКСОЙ Бас хатшысы Сұлтан Раев арнайы видеоүндеу жолдап, авторды жаңа еңбектерінің жарық көруімен құттықтады.

Таныстырылым барысында «Жүрек сөзі» кітабына енген эсселер, әдеби зерттеулер мен күнделік жазбаларының мазмұнына жан-жақты талдау жасалды. «Сөз патшасы» жинағындағы әдеби-сын мақалалар мен сұхбаттар қаламгердің кәсіби сыншылық болмысын, әдеби үдерісті зерделеудегі терең пайымын айқындайтыны айтылды.

Сонымен қатар Ромен Ролланның «Толстойдың өмірі» атты еңбегінің қазақ тіліндегі аудармасының маңызы сөз болып, әлем әдебиетінің көрнекті өкілі туралы танымды кеңейтудегі тәржіманың рөлі атап өтілді.

Амангелді Кеңшілікұлы Қазақстан Республикасы Ұлттық академиялық кітапханасында жүзеге асырылып келе жатқан, жоғары танымалдылыққа ие «Ашық әдеби лекция» жобасының жүргізушісі. Қазақ және әлем әдебиетін кең аудиторияға насихаттауға бағытталған жоба 2022 жылдан бері кітапхананың YouTube арнасында жүйелі түрде жарияланып келеді. Бүгінгі күнге дейін 50-ден астам лекция көрермен назарына ұсынылып, әдеби қауым тарапынан жоғары бағаланды.

Іс-шараға мемлекет және қоғам қайраткерлері, әдебиеттанушылар, зиялы қауым өкілдері, жас қаламгерлер, кітапхана оқырмандары қатысты.