Мұражай ҚР Ұлттық академиялық кітапханасының 10 жылдығына орай 2014 жылы ашылған. Бұл – Астана тұрғындары мен қала қонақтары ең көп келетін танымдық экскурсия залдарының бірі.
Мұражай екі залдан тұрады:
Бірінші зал – қазақ жазуы мен кітабының тарихына, баспа ісінің дамуына арналған. Мұнда оқырмандар мен келушілердің назарына түпнұсқа қолжазбалар мен көне басылымдар, ұлттық баспасөздің негізін қалаған құнды жәдігерлер ұсынылады. Атап айтқанда, көне орама қолжазбалар, бамбук таяқшаларына жазылған кітаптар, бағалы нефрит тастарымен көмкерілген, алтынмен апталып, күміспен қапталған сирек басылымдарды көре аласыз. Сондай-ақ жібек матаға басылған еңбектер мен факсимилелік басылымдар да бар.
Екінші зал – акакдемиктер әлеміне сахат. Кітаптардан бөлек танымал тұлғаларға тиесілі түрлі экспонаттар, жекелеген заттар мен кәдесыйлар және түрлі елдердің кітапханамызға тарту еткен сый-сияпаттары қойылған. Академик Зәки Ахметов, Шора Сарыбаев және халық ақыны Хамит Ерғалиевтің («Библиотека» деп аталатын 1976 ж. Румыниядан шыққан жиһаз гарнитурі) жек кітап қорын осы залдан табасыз!
Кітап мұражайы – өткен мен болашақты тоғыстырған бірегей мәдени кеңістік. Біз тарихтың тынысын сезініп, асыл мұрамен жүздескісі келетін әрбір қонақ үшін әрдайым ашықпыз.
Есігіміз баршаға ашық, кіру – тегін.