Дандай Ысқақұлы кітаптарын Ұлттық академиялық кітапханаға сыйға тартты

Қазақстанның еңбек сіңірген қайраткері, филология ғылымдарының докторы, профессор, белгілі әдебиет сыншысы әрі түркітанушы ғалым Дандай Ысқақұлы өзінің көпжылдық ғылыми-зерттеу еңбектерін қамтитын он томдық шығармалар жинағын Қазақстан Республикасы Ұлттық академиялық кітапханасына сыйға тартты.

Алматыдағы «Таңбалы» баспасынан енді ғана жарық көрген он томдыққа ғалымның әдеби сын тарихы мен теориясына, қазақ әдебиетінің даму үдерісіне, Алаштануға, Мұхтар Әуезов мұрасына, тіл мәселелері мен түркітануға арналған ғылыми зерттеулері мен мақалалары енген.

Сондай-ақ аталған жинақты Қазақстанның Ұлттық электронды кітапханасына (ҚазҰЭК) орналастыру жөнінде автормен келісімшарт жасалды.

Ұлттық академиялық кітапхана ұжымы Дандай Ысқақұлына құнды еңбектерін кітапхана қорына сыйға тартқаны үшін алғыс білдіреді.